ئه‌مشه‌و له‌ یه‌که‌م یاری قۆناغی 16ی جامی ئیسپانیادا و له‌  یاری چووندا له‌ نێو یاریگای کامپو هه‌ردوو یانه‌ی به‌رشلۆنه‌ و ئه‌تله‌تیک بلباو به‌ بێ گۆڵ به‌رامبه‌ربوون .. به‌رشلۆنه‌  که‌ له‌ دواین 15 یاریدا ‌هیچ یانه‌یه‌ک نه‌یتوانیوه‌ ببێته‌ به‌ربه‌ست و جگه‌ له‌ بردنه‌وه‌ هیچ ئه‌نجامێکی تری تۆمارنه‌کردووه‌ ، ئه‌مشه‌و له‌ ئه‌نجامێکی چاوه‌ڕواننه‌کراودا نه‌یتوانی گۆڵی یانه‌ی بلباو بهه‌ژێنێت و به‌ به‌رامبه‌ربوون یاریگای جێهێشت . به‌مه‌ش به‌رشه‌ له‌ یاری گه‌ڕانه‌وه‌ی له‌یاریگای سان مامیس ئه‌رکی ئاسان نه‌بێت  له‌و یارییه‌ی له‌ 5ی مانگی یه‌کی ساڵی تازه‌دا به‌ڕێوه‌ده‌چێت . ئه‌وه‌ی تایبه‌ت بێت به‌ یارییه‌که‌ی ئه‌مشه‌ویش  بلوگرانا به‌ درێژایی کات باشتر ده‌بینرا و چه‌ندین هه‌لی ئاسانیان له‌ده‌ستدا به‌ هه‌مان شێوه‌ی یارییه‌که‌ی به‌رامبه‌ر ئیسپانیۆل و یانه‌ی بلباویش زیاتر له‌ جارێک نزیک بوو له‌ تۆمارکردنی گۆڵی پێشکه‌وتن سه‌ره‌ڕای یاری نه‌کردنی ئه‌ستێره‌ی یانه‌که‌ی فرناندۆ لۆریێنتی ..

هه‌روه‌ها له‌ یارییه‌کی تری ئه‌مشه‌ودا هه‌ردوو یانه‌ی کۆردۆبا و دیپۆرتیڤۆ لاکۆرۆنا به‌ گۆڵێک بۆ هه‌رلایه‌ک به‌رامبه‌ربوون و کاتژمێر 12 ش له‌ یارییه‌کی به‌هێزدا هه‌ردوو یانه‌ی ڤاله‌نسیا و ڤیاڕیاڵ به‌یه‌ک ده‌گه‌ن.